De Seta cinemascope marko zabalaz baliatzen da irudietan atzitzeko "mattanza"-ren erritual zaharra: atungorri sarda oso baten hilketa Siziliako hego-mendebaldeko kostaldean, mendez mende iraun zuen jarduera, gaur egun ia desagertutzat hartzen dena. Pelikula hasten da olatuen erritmoarekin eta "tonnarotti"-en –atun arrantzaleak– koruarekin. Zain daude, jan eta lo egiten dute, eta sareak konpontzen dituzte larru beltzaran eta kresaltsuko gizonek. Harrapakina hurbiltzen ari dela entzuten dutenean, Atlantikotik ur beroetara errutera etorriak, “itsasoko laborariek” lanari ekiten diote. Kantari hasten dira eta atungorriak bideratzen dituzte sareen bitartez cámara de la morte baterantz. Talde lanean, gizonek sareak altxatzen dituzte, arrain handiak arpoiaz jo eta itsasontziratzeko. Odolak ura gorritzen du. De Setak arreta handia jartzen du zeregin tradizional honetan eta lan kolektibo baten xehetasunetan. Arrainek bezala, gizonek ere sarda bat osatzen dute, eta helburu komun batek batutako gorputz masa bat balira bezala filmatzen dituzte. Hilketa amaitzean, tonnarotti-ek txapela kentzen dute hildako arrainen aurrean.