1963ko neguan filmatua, Basker film dokumental etnografikoa da; bertan, maisutasun zinematografiko handiz euskal kulturako agerraldiak eta paisaiak hurbiltzen zaizkie ikus-entzule suediarrei. Dokumentua Nafarroan hasten da Iturengo eta Zubietako inauteriekin eta bertako joaldunen desfilea agertzen da. Folkloreari kirolak jarraitzen dio, zehazki, Bergaran pilota-partidarekin eta, Aian, desafioko herri-kirolekin, hots, idi-probekin eta ahari-jokoekin. Filmak beste hainbat une magiko ere jasotzen ditu, esaterako, aurresku-lehiaketa Abadiñon, txalapartaren soinu-irudi ederra Martuteneko Bilandegi baserrian eta Uztapide eta Basarri bertsolarien arteko ezin ordainduzko ika-mika. Laburbilduz, Suediari irekitako leihoa 60ko hamarkadan, gure ikus-entzuleentzako altxorra, gaur egunean.