18 herrialdetako 30 film bildu dira Punto de Vista Jaialdiko hamahirugarren edizioko Sail Ofizialean. Jaialdia 2019ko martxoaren 11tik 16ra bitarte egingo da Iruñean, eta Sail Ofizialeko 30 filmetatik 29k lehiatuko dira epaimahai ofizialak emango dituen hiru sariak lortzearren.
Aurtengoa orain arteko ediziorik nazioartekoena izango da, eta herrialde hauetako filmak egonen dira ikusgai: Kanada, Txile, Argentina, Alemania, Ingalaterra, AEBak, Irlanda, Indonesia, Belgika, Zambia, Frantzia, Dominikar Errepublika, Uzbekistan, Mexiko, Iran, Espainia, Portugal eta India. Sail Ofizialean, 10 programatan bilduko dira ikus-entzunezko hizkuntza garaikideen eta abangoardiakoen askotarikotasuna esploratzen duten filmak, hainbat gairen inguruan: memoriaren eraikuntza, soinuaren esplorazioa, amatasunaren eta sorkuntza garaikidearen arteko erlazioa, edo erretratuaren kontzeptua, besteak beste.
Zinema garaikideko zinemagile handiak bilduko dira Sail Ofizialean, hala nola Deborah Stratman, Robert Beavers, Eduardo Williams, Luke Fowler eta Ute Aurand. Hautaketa prozesuan Nuria Cubas, Matías Piñeiro, María Palacios Cruz, Miguel Zozaya eta Garbiñe Ortega programagileek parte hartu dute.
