Laborategiak

Punto de Vista Labs jakintzak trukatzeko eta elkarrekin sortzeko espazioa da. Jaialdiaren azken edizioan sortu zen eta aurten prestakuntzako eta sorkuntzako zenbait laborategiren eskutik bueltatu da, abangoardiako zinemarekin erlazionatutako hainbat ildotan lan egiteko asmoz. Punto de Vista Labsen 2019ko egitarauaren baitan azpimarratzekoak dira Rick Prelinger eta Luke Fowler zinemagileen presentzia eta Londresko Tate Modern museoko Museum of Clouds proiektu ibiltaria.

Luke Fowler

Luke Fowler (Glasgow, 1978) Glasgown bizi den artista, zinemagilea eta musikaria da. Grabatua ikasi zuen Duncan of Jordanstone College of Art and Design zentroan. Haren lanak zinematografia biografiko eta dokumentalaren mugak eta konbentzioak aztertzen ditu, eta 50eko hamarkadako British Free Cinemarekin alderatu ohi da. Artxiboko irudiekin, argazkiekin eta soinuarekin lanean, Fowlerren muntaketa filmikoek figura kontrakultural eta interesgarrien erretratuak sortzen dituzte. Fowlerrek inaugurazioko Derek Jarman Award saria jaso zuen 2008an, eta Turner Prize sarirako hautatu zuten 2012an.

Museum of Clouds

2018ko urrian, Museum of Clouds proiektua zela tarteko, mundu osoko artistak eta kontserbatzaileak bildu ziren Londresko Tate Modern museoan, azkeneko hamarkadan lanean aritu diren askotariko artistak eta zinemagileak konektatzen dituzten film, testuinguru eta figuretan esploratzeko. Hitzaldien eta proiekzioen zikloaren baitan izen handiko artisten lanak bildu ziren: Gabriel Abrantes, Basma Alsharif, Alexander Carver, Benjamin Crotty, Mati Diop, Beatrice Gibson, Shambhavi Kaul, Laida Lertxundi, Matías Piñeiro, Ben Rivers, Ben Russell, Daniel Schmidt, Ana Vaz eta Phillip Warnell. Eta Andrea Lissoni, Carly Whitefield eta Raoul Klooker aritu ziren komisario lanetan, Garbiñe Ortegaren laguntzarekin. Orduan, kontserbatzaile gonbidatuak Mark Peranson, Andréa Picard, Aily Nash, Natxo Checa, Garbiñe Ortega eta María Palacios Cruz izan ziren.

Prozesuan dagoen proiektu gisa planteatu izan da beti Museum of Clouds. Proiektu porotsu eta malgu bat. Irudimenezko espazio ibiltari bat, zinema mota jakin batean azkeneko urteetan marrazten joan den paisaia pentsatzen laguntzen diguna. Oraingo honetan, Museum of Clouds Punto de Vistara dator, programaziotik zinema eginez paisaia horri forma ematen dioten pertsonen lanari eta kontserbazio jarduerari erreparatzeko.

Proiektuaren bertsio honetan, kontserbatzaileen hainbat bilera egingo dira, eta baita aurkezpen publikoak ere, arte/zinema erakundeek eta jaialdiek elkarrekin lan egiteko modu desberdinen inguruan hausnartzeko eta era horiek partekatzeko. Aztertuko da nola eraikitzen ditugun gure audientziak, eta nola gidatzen ditugun gure programazioan barrena. Nola indartzen den komunitate bat programazio baten inguruan. Eta hausnartuko da ziklo batera gerturatzeko garaian sorkuntzarekin, kontzeptuekin eta semantikarekin zerikusia duten gaien inguruan.

Oraingo honetan, lanbide honetako hiru profesional handi bilduko dira gurera: Dennis Lim, New Yorkeko Lincoln Centerreko Film Societyko programazio zuzendaria; Eva Sangiorgi, Viennaleko zuzendaria (Vienna International Film Festival); eta Edwin Carels, Rotterdameko Nazioarteko Zinema Jaialdiko programatzailea. Ohore handi bat da haiek gurekin egotea.

Komisarioak: Garbiñe Ortega eta Tate Film (Andrea Lissoni, Senior Curator International Art/ Carly Whitefield, Assitant Curator, Film).

Rick Prelinger

Rick Prelinger (Washington, 1953) artxibozaina, zinemagilea eta Kaliforniako Unibertsitateko irakaslea da. 1980ko hamarkadaz geroztik artxibozaintza zinematografikoaren arloan lan egiten du, eta 2000n akordioa sinatu zuen Internet Archiverekin, sarean 2.100 film jartzeko; harrezkero, kopuru horrek hazten jarraitu du. Film hauek egin ditu: Panorama Ephemera (2004), No More Road Trips? (2013) eta All-Is-Well (2016). Horiez gain, Lost Landscapes of San Francisco eta Lost Landscapes of Detroit izeneko film programak edo “esku hartze historikoak” sortu ditu. Megan Prelingerrekin batera Prelinger Library sortu zuen, ikerkuntzarako liburutegi bat nahi duen ororentzat San Frantzisko erdigunean.