2020

Alberto Gracia

Albertok Arte Ederrak ikasi zuen, eskultura espezialitatean. Duela hamabost urte baino gehiago izan zuen lehen hartu-emana ikus-entzunezkoen errealizazioarekin: ekintza eta performance txikiak filmatzen zituen, eta zaborrarekin egindako makina iragankor kaxkarren mugimendua dokumentatu zuen. 2007. urtean, lehen film luzea filmatu zuen super-16 mm formatuan: Microfugas. O Quinto Evanxeo de Gaspar Hauser; film horrek FIPRESCI saria irabazi zuen Rotterdamen, 2013. urtean. La estrella errante filma jaialdi horretan bertan aurkeztu zuen 2018an. Gaur egun, hirugarren film luzea prestatzen ari da.

Laida Lertxundi

Laida Lertxundi artista da, zinemagilea eta Elías Querejeta Zine Eskolako Sorkuntza Departamentuko koordinatzailea. Bere lanak, 16 mm-tan grabatuak gehienak, barrutasunaren espazio intimoen eta paisaia handien handitasunaren artean mugitzen dira, asmoa izanik subjektibotasunak eta afektuek eraldatutako geografia bat hartzea. Bere filmak mundu osoko festibal eta galerietan egon dira ikusgai: Locarno, Toronto, Rotterdam, New York eta Gijón; MoMa, Tate Modern eta Whitechapel Gallery. Eta erakusketak egin ditu honako hauetan: Matadero, LUX, FuturDome, Tabakalera, Azkuna Zentroa, Katonah Museum of Art, Hammer Museum, Habanako Bienalean eta Lyongo Bienalean. 2019. urtean "Landscape Plus" liburua argitaratu zuen. Bere lanak LUXek banatzen ditu Londresen, eta Reina Sofia Museoko bilduman sartuta dago.

Maider Fernández

Maider Fernández Iriarte (Donostia, 1988) hezitzailea eta zinemagilea da. Gizarte Hezkuntza ikasi zuen Euskal Herriko Unibertsitatean, Telebistako eta zinemako errealizazioa ESCIVIn eta Sorkuntzako Dokumentalari buruzko masterra Universitat Pompeu Fabra unibertsitatean. Zinemarekin lotutako hezkuntza proiektuetan parte hartu izan du, hala nola Cinema en curs, eta Drac Màgic ikus-entzunezko kooperatibarekin ere jardun du. Las chicas de Pasaik kolektiboan parte hartu zuen. Jaialdi askotan saritu izan dituzte bere lanak: Mar del Plata, Málaga, Göteborg, Zinebi eta Gijón; eta arte zentroetan ere egon izan dira: DA2000, Institut Valencià d'Art Modern eta The Centre for Contemporary Arts (Glasgow). Bere lehen film luzea, "Las letras de Jordi", Donostia Zinemaldian estreinatu zen 2019. urtean, Zuzendari Berriak sailean, eta epaimahaiaren bi aipamen berezi izan zituen Alcances eta L'Alternativa jaialdietan.