2022ko edizioa
Atzera begiradak
Punto de Vistaren atzera begirakoen helburua zinemaren historia birpentsatzea eta Espainian lanik ikusgai ia izan ez duten zinemagileen eta artisten lana ezagutaraztea da. Aurten, bi atzera begirako egingo dira. Amos Vogel-i buruzko atzera begirakoa, Alexander Horwath eta Regina Schlagnitweit komisario dituena, funtsezko kuradore eta Cinema 16-ren sortzaileari eginiko omenaldi gisa pentsatuta dago, haren jaiotzaren 100. urteurrena den honetan. Garbiñe Ortega izan da, bestalde, Nancy Holt-i buruzko zikloaren kuradore, eta lau programatan Land Art mugimenduaren erakusgarri handiena izan zen diziplina anitzeko artistaren lanak bildu ditu, orain arte ia ezezagunak izan baitira zinemaren arloan egin dituenak.
Lan
Lan izena jarri diogu jaialdiko sail berriari, bertan bilduko gara hainbat modutan zinema dokumentaleko lan eta irudimen prozesuen inguruan gogoetatzeko.
Contactos
Contactos sailak gainerako arte diziplinei eta zientziak deritzogun ezagutza jarduerei zabaltzen die zinema. Eta hori bereziki garrantzitsua da gogoan zinema dokumentala hartzen badugu, zinema mota hori berez baitago bideratuta hausnarketara eta ezagutzara, gainerako arte garaikideekin partekatzen baitu errealitatea ikertzeko interesa. Sailak Espainiako zinemagintzaren historiako film erradikal eta muturretako batetik hartzen du izena, Contactos filmetik (Paulino Viota, 1970), jaialdiko lehenengo Heterodocsias Rewind sailean (2010) izandakotik.
X Films 2022
Urtero, 2010az geroztik, Punto de Vista jaialdiak hiru errealizadore gonbidatzen ditu Nafarroan dokumental saiakera baten proiektua aurkeztu eta filmatu dezaten. X Films Proiektuak Juan Huartek 1963an fundatutako ekoiztetxe nafarretik hartzen du izena, “interes artistiko bereziko" filmak egiteko asmoz sortu zuen, eta bertan egin zituzten lehen urrats zinematografikoak Jorge Oteizak, Nestor Basterretxeak, Rafael Ruiz Balerdik, Jose Antonio Sistiagak eta beste sortzaile askok. Mezenasgo espiritu hura berreskuratuz, jaialdiak lan berri bat sortzeko eta, aldi berean, fikziotik kanpoko ahots berriak Nafarroako lurraldera hurbiltzeko aukera eman nahi die sortzen ari diren zinemagileei.
Hezkuntza programa
Hirian lan komunitarioa egitea eta publikoak prestatzea da Punto de Vistaren helburu nagusietako bat.
Programa hau haur eta gazteentzat da bereziki, eta hainbat jarduera proposatzen ditu ikusentzunezko arloan sentsibilizatzeko eta hura balioztatzeko. Aurtengo edizioan, Drac Màgic eta A Bao A Qu-rekin elkarlanean, proiekzio eta elkarrizketa saioak, haurrentzako tailerrak eta programazio tailer bat proposatzen ditugu.
 |
|
|