Zazpigarren edizioan, Punto de Vista Jaialdiak halaxe erabakita, emanaldiak ahalik eta gehien metatuko dira, egoitza kopurua murrizteko. Iazkoan, egoitza hiriko alde zaharrean dagoen Kondestablearen Jauregira eraman zen, eta aurtengoan, emanaldi gehienak Saide Carlos III zinema-tokietan eginen dira, jaialdiaren egoitzatik oso hurbil baitaude. Punto de Vista, Nafarroako Zinema Dokumentaleko Nazioarteko Jaialdia Iruñean eginen da, otsailaren 22tik 27ra.
Aurtengoan, ikusleek jaialdiko programaziora (lau saio, eguneko) joatea errazago izan dezaten eta, antolaketa-prozesuak hobetzeko, Punto de Vistak Carlos III zinema-tokietako hiru aretoetan emanen ditu jaialdiko ohiko sailak (Ofiziala, Heterodocsias, Erdialdeko Eskualdea, atzera begiradaka eta ekitaldi bereziak), bai eta prentsa-paseak ere, eta bertan ere eginen dira goizean zuzendarien eta kazetarien arteko topaketak.
Kondestablearen Jauregian, bestalde, kreditatuen topagunea ezarriko da eta, aldi berean, bertan prentsaurrekoak, mahai-inguruak eta “Panorama INAAC” zikloko film-emanaldiak eginen dira, bai eta jaialdia amaitzeko gala ere, otsailaren 27an, zazpigarren edizioari bukaera emateko.