Oskar Alegría, Diana Toucedo eta Jorge Tur errealizadoreak, X films proiektuaren hirugarren edizioko gonbidatuak

Goitik behera, Behetik gora

Punto de Vista Jaialdiak, X Films proiektuaren bidez, urtero film bat ekoizten du filmatutako egunerokoaren itxuran. Proiektuaren hirugarren edizioan, aurtengo hiru parte-hartzaileak hautatuta daude: Oskar Alegría, Diana Toucedo eta Jorge Tur. Hirurek datorren otsailean haien proiektuak eta aurretik egindako lanen hautaketa aurkeztuko dituzte, Punto de Vista nazioarteko mintegian. Hiru proiektu horien artean bat hautatuko da 2012an ekoizteko.

Oskar Alegríak bidaia-erreportajeak idazten ditu El País egunkariko El Viajero gehigarrian. Las ciudades visibles izeneko hiriko argazkien proiektu artistiko baten egilea da, eta lan horri abala eman diote Enrique Vila-Matas idazleak eta Isidoro Valcárcel Medina eta Esther Ferrer artista plastikoek. Argazki-bildumen erakusketak egin ditu Mapamundistas topaketetarako, Iruñean, eta Photomuseumerako, Zarautzen. 2009tik dokumentaletako gidoien irakaslea da Nafarroako Unibertsitateko Ikus-entzunezko Gidoien Masterrean, eta haurrentzako argazki abstraktuen tailerra zuzendu du Chillida-Leku museoan. Gaur egun lehenengo film luzea amaitzen ari da, Emak Bakia izeneko etxeari buruzko filma. Leku horretan, Man Rayk izen bereko “zinepoema” bat grabatu zuen 1926an, Biarritzetik hurbil.

Diana Toucedo muntaketan espezializatu zen lehenengo, eta gero Zinema eta Ikus-entzunezko Garaikideen Masterra egin zuen Pompeu Fabra Unibertsitatean. Bi urtez Mariscal Estudioan lan egin zuen Fernando Truebak eta Javier Mariscalek zuzendutako Chico y Rita (2010) animazio-filmaren muntaketan, eta diseinatzaile ospetsuarekin lankidetzan aritu da ikus-lan askotan. Jaume Plensa eskultore katalanarekin ikus-eskultura baten irudiak postprodukzio fasean editatu eta zuzendu ditu Seulen, Korean. Aldi berean, zenbait piezatan zuzendari moduan lan egin du: Ser de Luz, Gustav Deutschen materialekin (2009) eta Tres tiempos tres gestos, Naomi Kawaseren lanaren gainean (2010). Isaki Lacuestarekin Kawaserekin grabatutako korrespondentzia muntatu zuen In Between days (2009) lanean CCCBrako eta La noche que no acaba (2010) TCMrako. Azken horrek urteko dokumental onenaren saria jaso zuen Tolosako (Frantzia) Espainiar Zinemaren Jaialdian (2011). Gaur egun, lehenengo film luze dokumentala zuzentzen ari da Galizian, Trinta Lumes izenburupean.

Jorge Tur Psikologiako lizentziatua da eta Dokumental Sortzailearen Maisutza egin du Bartzelonako Universitat Autònoman (UAB). 2006an De funció lana zuzendu zuen eta hainbat sari eskuratu zituen, besteak beste, Nazioarteko Dokumental Onenaren 'Manoel de Oliveira' saria Cine Curtas Vila Do Conde Nazioarteko Jaialdian, Portugalen, eta Zuzendaritzarik Onenari emandako Egile Berriaren Saria Sitgesgo Nazioarteko Zinema Jaialdian, Katalunian. Hurrengo lanarekin, Castillo (2009), Epaimahaiaren Aipamen Berezia jaso zuen Las Palmasgo Nazioarteko Zinema Jaialdian. Ondoren Si yo fuera tú, me gustarían los Cicatriz (2010) lana etorri zen eta Florentziako Dei Popoli Jaialdian Epaimahaiaren Aipamen Berezia lortu zuen. Azken lana Diario Ruso da eta oraintsu estreinatu da Nyongo Visions Du Reél Jaialdian, Suitzan. Gaur egun, Dokumental Sortzailaren Masterreko irakaslea eta proiektuen ekoizpen-koordinatzailea da UABn.

Hiru errealizadoreek otsailaren 24an eta 25ean aurkeztuko dituzte haien proiektuak, 2012ko Punto de Vista nazioarteko mintegian. Otsailaren 24an, 20:00etan, Nafarroako Filmotekan, X Films proiektuari eskainitako saioa egongo da nahi duten guztientzat (sarrera doan). Saio horretan, hiru errealizadoreen lanak ikusi ahal izango dira, baita 2011ko X Films proiektuko pieza ere, Vicente Vázquezek eta Usue Arrietak osatutako weareQQ kolektiboaren Goitik behera, Behetik gora. Filmaren trailerra ikusi nahi baduzu, sakatu hemen.