Punto de Vista-ren hamabigarren edizioko berritasun aipagarrienetako bat DOKBIZIA da (zuzeneko dokumentala). Zinemagile, ikusmen-arloko artista, idazle eta performerren arteko elkarretaratze hori pantaila barruan eta pantailatik kanpo irekitzen zaio dokumentalari, zinematik haratago, beste modu batean egingo ez liratekeen beste esparru batzuetako diskurtsoei atea zabalduz. Sortzaileen batze horrek diziplina arteko zubi bat eraiki nahi du, benetako gauzen esperientzia ikuspegi desberdinetatik trukatzeko, hausnartzeko eta bizitzeko.
DOKBIZIA-k gai nagusi bat izango du urtero, eta edizio honetan DADME, PUES, UN CUERPO (EMAN IEZADAZUE, BADA, GORPUTZ BAT) azpititulua izango du, Gilles Deleuze filosofoaren testu honetan inspiratua: “ezin da esan gorputzak pentsatu egiten duenik, tematia eta egoskorra izanik, berak pentsatzera behartzen duela baizik, eta pentsamenduari ihes egiten diona pentsatzera behartzen du, hain zuzen ere, bizitza”. Abiapuntu horrekin, DOKBIZIAk gorputza mugitzen den irudiarekiko hainbat modu hausnartu eta esperimentatu nahi ditu, benetako gauzetara iristeko bide diren politika eta estetika desberdinak.
DOKBIZIAren programan gorputzaren errepresentazioari buruz hausnartzen duten saioak egongo dira (Laida Lertxundi, Basma Alsharif edo Abigail Child-en filmak), ekintza koreografikoak barne hartzen dituzten irakurketak (Thing Said Once, Esperanza Colladorena), emakume-gorputzaren politika aztertzen duten konferentziak (Trinh Minh-ha eta Marta Selvaren maisu-eskola), Mexikoko demokraziaren egoerari buruz galdetzen duten pieza eszenikoak (Tijuana de Lagartijas Tiradas al Sol), konferentzia performatiboak, esaterako, Nico Peredaren La Trilogía de Propiedad Privada, Avalancheren zuzeneko pieza (Carlos Casas Audiolabekin elkarlanean), entzunaldi kolektiboak (LEVE), eta eremu publikoko esku-hartzeak errealitatearen pertzepzioari buruz (Naturaleza y su temblor, Idoia Zabaleta eta Tomás Aragayrena).
Azken batean, harrituta geratzeko gogoz egin nahi den bidea da DOKBIZIA, jarrera irekiarekin eta geruza eta tolestura guztien eragina jasotzeko prest. Hauxe da proposameneko programa xehatua:
1. HITZALDIAK
2. PROIEKZIOAK
3. MINTZALDI PERFORMATIBOAK
4. PIEZA ESZENIKOAK ETA SITE-SPECIFIC
5. PERFORMANCES