Ruth Somalo, Jorge Villacorta eta Ainara Elgoibar izanen dira epaimahaikide 2024ko Punto de Vista jaialdiaren Sail Ofizialeko nazioarteko epaimahaian

Ruth Somalo zinemagile eta komisarioa, Jorge Villacorta arte kritikari eta kuradore independentea eta Ainara Elgoibar artista izanen dira, aurten, martxoaren 11tik 16ra bitarte Iruñean eginen den Punto de Vista jaialdiaren Sail Ofiziala baloratzeaz arduratuko den Nazioarteko Epaimahaiko kideak. Somalok, Villacortak eta Elgoibarrek lehian dauden hiru sari nagusien irabazleak aukeratuko dituzte: Film onenaren Punto de Vista Sari Nagusia –10.000 euro–, Zuzendari onenaren Jean Vigo saria –5.000 euro– eta Film labur onenaren saria –3.000 euro eta EITBk babestua–. Horietaz gain, bi aipamen berezi ere eman ahal izanen dituzte, diru saririk gabe. Sari horiekin batera, Sail Ofizialaren barruan, beste bi hauek ere banatuko dituzte: Publikoaren sari berezia Film onenari –1.650 euro– edo Gazteen saria Film onenari, Nafarroako Gazteriaren Institutuaren laguntzarekin –1.500 euro–. Ruth Somaloren presentziak Acción Cultural Españolaren (AC/E) laguntza izan du, Espainiako Kultura Nazioartekotzeko Programari (PICE) esker.

Datorren ostiralean, otsailak 23, jarriko dira salgai jaialdiko sarrera orokorrak, jaialdiaren webgunearen bitartez eta Baluarteko leihatilan. Profesional, ikasle eta prentsako kideen akreditazioak eskuratzeko epea otsailaren 29an amaituko da, ostegunarekin.

EPAIMAHAIAK

Ruth Somalo

Programatzaile nagusia da DOC NYC, Architecture and Design Film Festival eta DocumentaMadrid jaialdietan. Zinema-komisarioa, doktoratu aurreko ikertzailea eta New York-en bizi den espainiar zinemagilea. Film luze eta laburrak egin ditu, eta areto komertzialetan ez ezik, jaialdi ugaritan ere izan dira ikusgai. Ruth mentore eta irakasle ere bada Brooklyn-go UnionDocs Arte Dokumentalen Zentroko laborategietan. Flaherty Nazioarteko Mintegiaren Zuzendaritza Batzordeko presidente izan da, eta Programazio Batzordeko buru da orain.

Jorge Villacorta Chávez

Arte-kritikaria eta kuradore independentea. Kuradore kidea VIDEOGRAFÍAS (IN)VISIBLES: Una selección de videoarte latinoamericano 2000-2005 zikloan (Valladolideko Patio Herreriano Museoa; Arte Modernoaren Zentro Atlantikoa, Kanariak; eta gerora erakusketa ibiltaria Latinoamerikako AECID zentroetan). Kuradore kidea izan zen VIDEO-TRANSLACIONES - 13 videoinstalaciones por artistas peruanos erakusketan, Madrilgo Condeduque Kultura Garaikidearen Zentroan, 2019an. Eta kuradore kidea izan zen LA PAZ ES UNA PROMESA CORROSIVA erakusketan; Herbert Rodríguez artistak 1985etik 1990era sortutako arte kritikoa eta agit-prop lanak bildu zituzten bertan, Veneziako 58. Bienalean (2022), Peruko Pabiloian. Gaur egun, arte elektronikoak sustatzen eta zabaltzen dituen ATA (Alta Tecnología Andina) erakundeko presidentea da. Peruko Kultura Ministerioak Kulturaren Nortasun gisa aitortu zuen 2013an. Limako Memoriaren, Tolerantziaren eta Gizarteratzearen Lekua (LUM) deritzon guneko erakusketa iraunkorraren kuradore taldeko kide izan zen.  Liman bizi da.

Ainara Elgoibar

Ainara Elgoibar (Bizkaia, 1975) artista da eta gaur egun Bilbon bizi da. Enpresa ikasketetan lizentziaduna da (Deustuko Unibertsitatea), eta bere lan ibilbideko lehen urteak enpresa multinazionalen arloan egin zituen, Bruselan lehenengo eta Bartzelonan ondoren. Hiri horretan bertan, Arte Ederretan lizentziatu zen (UB), eta egonaldiak egin zituen hauetan: Cooper Union School of Art NYC eta Manchester Metropolitan University. 2018an cum laude doktoratu zen Arte Ederretan (UB). Ikus-entzunezko formatuan lan egin du gehienbat, eta, besteak beste, honako leku hauetan egin ditu erakusketak: Artium, Fundació Tàpies, La Capella eta Macba. 2013an, Tractora Koop. E. enpresa sortu zuen beste batzuekin batera. Artisten enpresa kooperatiba horren egoitza Bizkaian dago, eta interesak eta lotura afektiboak partekatzen dituzten bazkideen eta hirugarrenen proiektuen ekoizpen artistikoko plataformatzat definitzen du bere burua. Bere lanak ekoitzi ditu Tractora Koop E. enpresa gisa eta enpresa horretatik, baita beste batzuen lanak ere. Tractora enpresaren parte gisa, Landa lan. A Documentation of Darcy Lange (2018-2019) erakusketaren komisariotzan eta ekoizpenean lan egin zuen Tabakaleran (Donostia). 2019an, Usue Arrietarekin batera, Kinu lantaldea jarri zuen martxan, egoitza Bilbon duen artisten zinemaren inguruko programazio eta autoformakuntzako plataforma bat.