PROGRAMA 6 AN OCEANIC FEELING |
---|
Herrialdea: Arabiar Emirerri Batuak, India, Yemen, Somalia, Qatar, Pakistan, Oman, Kuwait, Kenya, Irak, Iran
Urtea: 2013
Iraupena: 83'
Zuzendaritza: CAMP (Shaina Anand, Ashok Sukumaran)
CAMP izenpean diharduten Shaina Anand eta Ashok Sukumararen arabera, “itsasontzi batek botere handiak ditu: eraikitzen denean gizarte bat batzen du, ondasunak banatzen ditu, eta pertsonak eta ideiak garraiatzen ditu inoiz baino desberdinagoak iruditzen zaizkigun lekuetan barrena”. Dokumentazio kolektiboko egitasmo honetan, Indiako Kutch Golkoko merkataritza marinelak bidaian doaz Arabiako Itsasotik Pertsiar Golkora, baita urrutirago ere, eta era guztietako salgaiak garraiatzen dituzte. Lau urtez bildutako materiala erabilita, CAMPek HD bideo bat ontzen du, marinelek berek telefono mugikorrez eta bideokamerez hartutako irudiekin. Testura heterogeneo hauek –argitasun gardenetik pixelazio piktorikoraino– uztartu egiten dira Bollywood edukiekin eta marinelek aukeratutako kantu erlijiosoekin, eta emaitza film bildumazale bat da, aldi berean erakusten dituena intimitate ukigarri bat eta irismen handi bat, alaitasunez, adiskidetasunez, elkartasunez eta baikortasunez beteriko itsas langileria baten lekukotasun gisa. “Egiazko gertakarietan eta egiazko gertakarien bideoetan oinarritzen den film” honek –horixe dio hasierako tituluak– harrigarriro gogorarazten digu honako hau: gure sistema globala, sarritan “kapitalismo kognitibo” gisa definitzen bada ere –informazio trafikoa, lan immaterialak elikatutakoa–, oraindik oinarrituta dago egiazko ondasunak fabrikatu eta garraiatzen dituzten egiazko gorputzen lan fisikoan.
Uso de cookies:
Este sitio web utiliza cookies, tanto propias como de terceros, para recopilar información estadística sobre su navegación. Si continúa navegando, consideramos que acepta su uso. Más información