Curupira

Amazoniako bihotzean, Tauaryko biztanleek oihaneko soinuak entzuteko gonbidapena egiten digute, hegaztien eta animalien hotsak entzuteko gonbidapena, baina soinu arraro batzuk ere agertzen dira: izaki bat dabil kuxkuxean zuhaitz artean. Batzuek entzun izan dute, oso gutxik ikusi, eta aurkitu izan dutenak ez dira inoiz itzuli. Liluratzeko ahalmena du, sorgintzekoa. Jendea galarazi egiten du: nork bere erara kontatzen du bizi izan duena, eta soinuak dezifratzen saiatzen da.

Félix Blume (Frantzia, 1984) soinuekin lan egiten duen artista eta soinu ingeniaria da. Bere lanak mundu osoko irratietan entzun izan dira, eta baita beste leku batzuetan ere, hala nola Centre Pompidou eta Musée d'Orsay museoetan. Soundscape saria jaso du bere azken lanagatik: Curupira, criatura del bosque. Eta Pierre Schaeffer saria Phonurgia Nova Awards sarietan, Los Gritos de México lanagatik. Nazioarteko jaialdietan eta erakusketetan parte hartu izan du: LOOP Barcelona (2015), CCCB Barcelona (2015), Tsonami Arte Sonoro Chile (2015, 2018), Fonoteca Nacional México (2016), Ex Teresa México (2016), CENTEX Chile (2017), CTM Berlín (2017), Belluard Festival (2018), Arts Santa Mònica Barcelona (2018) eta Tailandiako Bienala (2018), besteak beste.