Estreinaldia Espainian
Gaueko eszenak, marrazkiak eta Joseon dinastiako idazleen poema zatiak biltzen dituen paisaia.
«Gaueko aire garbia uraren azalean intsinuatzen da, eta ilberria normalean baino altuagoa eta distiratsuagoa da». Night Walk lanean kaligrafiatuta agertzen den poemetako batek bere formari hasiera ematen diola dirudi. Mendiak inguratzen dituen Seulgo Segeomjeong auzoaren ikuspegi multzo bat da filma. Ibilaldi bakarti honetan gauzak uretan islatuta bezala ikusten dira. Ez dago koloretan egina, ezta zuri-beltzean ere, urdin gradienteetan baizik. Ikuspegiek espazio bat erakusten digute, berarekin hainbat denbora kargatzen dituena. Haizeak, urak eta isilpeko animaliaren batek eragindako mugimendu arinen artean giza eraikuntzak agertzen dira. Duela zenbait mende, Joseon dinastiaren garaian (1392-1897), poeten auzoa izan zen. Urdin gradienteen parte izango balira bezala, gaueko ibilaldiak mota guztietako eraikinak jartzen ditu agerian, Hanok zaharretatik hasi eta argi zuridun eta kristalezko eraikin berrietaraino. Ikuspegien gainean zenbait marrazki eta diagrama agertzen dira, kanal baten edo argiaren edo gauzen formen mugimenduen erregistroak. Ibilaldien zatiei buruzko poemak ere agertzen dira, auzo honen hasieran garaikideak izan ziren testuak. Testu moduan agertzen diren ahots horiek eta mendi horren ertzean mendeetan izandako aztarnetan bakarrik agertzen diren giza presentzia horiek ikusten dira, baina ez dira entzuten. Filma, nabaritzen ez den arren, isila da. Norberak entzuten duena norberarena izango da soilik.
Lucia Salas