Jaialdiaren ideiak

Ikusleak garen aldetik ikus-entzunezko objektu zehatz batekin eratzen dugun harreman subjektiboa da dokumentala. Beraz, dokumentala topalekua dela esan dezakegu.

Nafarroako Zine Dokumentalaren Nazioarteko Jaialdia (Punto de Vista), maila ugari uztartzen dituen topagunea da. Lehenengo eta behin, ikusle, zinemagile eta teorikoentzako esparrua da, dokumentalaren inguruan hitz egiteko erabiltzen dutena, bai eta ez-fikzioaren adierazpen mugakide eta heterodoxoen inguruan ere. Bigarrenik, topagune berezia eta tenporala da. Mundu osoko zine dokumentalak bat egingo duen toki bilakatu nahi du, urtez urte, Punto de Vista-k. Baina dokumentalaren iraganak eta etorkizunak elkarrizketa izateko eremua ere izan nahi du. Bertan, ez-fikziozko zinemagintzaren tradizio anitzak uztartuko dira, proposamen arriskatu eta berritzaileen bidez. Punto de Vista, beraz, dialogorako esparru gisa eratu da, non topaketa guztiak aurrera begirako borondate berritzailez egiten diren.

Jaialdiak helburu ugari dituen arren, horien artean funtsezkoena da, proposamen arriskatu eta aurrerakoiak egiten dituzten egileen obrei erantzuna ematea; egile horien lana, izan ere, gizakiaren beraren eta horren bizi-baldintzen inguruko ezagutza-prozesuan oinarrituta dago, gizarte jakin batzuetako testuinguru historikoetan, betiere. Autore horiek errealitatearen inguruko gogoeta egiten dute, bai gauzatzen duten lanaren bidez, bai beraien proposamen formalen subjektuekin nahiz publikoarekin ezartzen duten harreman etikoaren bidez. Errealitatearen antzematea, eta errealitate hori ikus-entzunezkoen bidez adierazi edota pentsatzeko erabiltzen duten zinemagileen topagune izan nahi du Jaialdiak. Jaialdian, oro har, errealitatea ulertzeko ahalegina edota gogoeta helburu duten pelikula dokumentalak hartu dezakete parte.

Punto de Vista-rentzat, dokumental-egileak nahitaezko konpromisoa izan behar du errealitatearekin eta, zentzu horretan, elkarrekin lotu behar ditu bere obrako subjektu eta ikusleak, ikus-entzunezko baliabideak erabilita, betiere.

Atal desberdinen bidez eta, batez ere, Nazioarteko lehiaketarekin, Punto de Vistak ez-fikzioa adierazpide benetan independente eta sozialki beharrezkoarekin lotzen dituzten pelikulen ezagutzak sustatu eta bultzatuko ditu.

Jaialdiak, azkenik, zinegileen eta ikusleen arteko topaketa ere lortu nahi du, pelikulek eskaintzen duten ezagutza-proposamenen bidez. Era berean, eztabaida eta gogoeta teorikoak sorraraztea izango da Jaialdiaren helburua. Laburbilduz, dokumentalaren eta ez-fikzioaren ospakizuna dela san genezake.